1-12
Fest Feliksdən tamamilə fərqli insan idi: biz onun haqqında çox az məlumata malikik. Lakin onu bilirik ki, o, ədalətli və düzgün insan idi. Cəmi iki il hökmdarlıq edəndən sonra öldü, amma pis əməlləri ilə adını ləkələmədi. Yəhudilər ondan öz məqsədləri üçün istifadə etməyə çalışırdılar. Onlar istəyirdilər ki, Fest Paulu Yerusəlimə çağırsın. Çünki yenə də Paulu yolda öldürmək niyyətinə düşmüşdülər. Lakin Fest romalı idi. O, bütün romalılar kimi ədalətli idi. O, yəhudiləri Qeysəriyyəyə gəlməyə və orada öz ittihamlarını söyləməyə dəvət etdi. Paulun cavablarından yəhudilərin ona qarşı necə pis ittihamlar irəli sürdüyünü görə bilərik. Onlar Paulu bidətdə, Məbədi təhqir etməkdə və üsyan qaldırmaqda ittiham edirdilər. Düzdür, onlara görə, bidət ittihamı haqlı idi. Lakin Roma qaydalarına görə bidətin heç bir hüquqi qüvvəsi yox idi. Ancaq küfr və üsyan ittihamları yalan idi.
Fest hakimiyyətinin ilk günlərindən yəhudiləri özünə qarşı qaldırmaq niyyətində deyildi və güzəştə getməyi təklif etdi. Fest Pauldan soruşdu ki, ədalətə zəmanət verildiyi halda, mühakimə olunmaq üçün o, Yerusəlimə getməyə hazırdırmı? Amma Paul bilirdi ki, Yerusəlimdə ədalətli mühakimə olunmayacaq. Buna görə çox vacib bir qərar verdi. Roma vətəndaşı əyalət məhkəməsində ədalətə nail olmayacağını görərdisə, birbaşa imperatora müraciət edə bilərdi. Yalnız cinayət başında yaxalanan qatillər, dəniz quldurları və cinayətkarlar bu hüquqdan məhrum idilər. Digər hallarda isə məhkəmə qapalı keçirilirdi və iddiaçı imperatorun şəxsi qərarı üçün Romaya göndərilirdi. Paul «Mən qeysərin məhkəməsinə müraciət etmək istəyirəm» cümləsini söyləyəndə, Festin başqa seçimi qalmadı. Beləcə Paul təsəvvür etdiyindən tamamilə fərqli şəraitdə Romaya ilk addımını atdı.
13-21
Aqrippa hələ də İsrailin çox kiçik bir hissəsinin — Qalileyanın və Pereanın hökmdarı idi. O, bu az şeyə yalnız romalıların lütfü ilə sahib olduğunu yaxşı bilirdi. Ona vəzifə verən romalılar idi. Romalılar da onu vəzifəsindən azad edə bilərdilər. Buna görə də Roma valisi vəzifəsinə başlayanda, o, hörmət əlaməti olaraq ona baş çəkərdi. Berniki Feliksin arvadı Drusillanın və Aqrippanın bacısı idi. Fest bilirdi ki, Aqrippa yəhudi inancının və adət-ənənələrinin bütün incəliklərinə yaxşı bələddir. Buna görə də Paulun işini onunla müzakirə etməyi təklif etdi. O, heç bir qərəzə yol vermədən məsələ barədə Aqrippanı məlumatlandırdı. Beləcə Paul hökmdarın önündə onun barəsində irəli sürülən ittihamlara qarşı özünü müdafiə etmək imkanı qazandı.
«…siz Mənə görə valilərin və padşahların qarşısına aparılacaqsınız» (Matta 10:18). Xəbərdaredici peyğəmbərlik yerinə yetdi. Lakin vəd edilmiş kömək də (Matta 10:19) bol-bol verildi.
22-27
Fest çətin vəziyyətə düşdü. Roma qanunlarına görə, bir şəxs Qeysərin məhkəməsini tələb edirdisə, ona qarşı irəli sürülən ittihamlar haqqında yazılı hesabat Romaya göndərilməli idi. Çətinlik o idi ki, Festin fikrincə, onun Paula qarşı Romaya göndərə biləcəyi heç bir ciddi ittiham yox idi. Ona görə də o, bu görüşü təşkil etdi.
Bütün Əhdi-Cədiddə bundan dramatik vəziyyət yoxdur. Aqrippa və Berniki təntənəli ziyafət geyimində idilər. Çox güman, onlar bənövşəyi padşah paltarları geyinmişdilər və alınlarında qızıldan tac var idi. Şübhəsiz ki, Fest də dövlət işlərini görərkən hökmdara yaraşan tərzdə qırmızı paltarını geyinmişdi. Yəqin ki, hökmdar Aqrippanın əyanları da onun yanında idilər. Çox güman, orada yəhudilərin nüfuzlu nümayəndələri də iştirak edirdilər. Festin yanında Qeysəriyyədə yerləşən beş koqortanın sərkərdələri dayanmışdı. Hamısının arxasında fəxri qarovul kimi hündürboylu Roma döyüşçülərindən ibarət sanballı bir falanqa4 dayanmışdı.
Budur, belə bir səhnəyə qısa boylu, çadır ustası olan yəhudi — Paul əlləri qandallı vəziyyətdə daxil olur. Lakin danışmağa başladığı andan Paul diqqət mərkəzinə düşür. Bəzi insanlar ətrafa böyük təsir göstərə bilir. Qəlbində Məsih, sağında isə Allah olan insan səlahiyyətin sirrinə sahibdir. Belə birisi kimdən qorxmalıdır?