1-10
Ali Şuranın önündə Paul cəsarətlə danışırdı. O, yaxşı bilirdi ki, geriyə yol yoxdur. Hətta çıxışının lap əvvəlində sanki meydan oxuyurdu. Ali Şuraya qardaşlar deyə xitab etmək — özünü onlarla eyni səviyyəyə qoymaq demək idi. Adətən, Ali Şuraya müraciət belə olmalı idi: «Hörmətli İsrail başçıları və ağsaqqalları». Baş kahin Paulun ağzından vurulmasını əmr edəndə, o, «Yəhudinin yanağına vuran Rəbbin izzətinə zərbə vurur» Qanununu pozmuş oldu. Paul dərhal baş kahinə hücum edərək onu üzü ağardılan divar adlandırdı. Ölüyə toxunan yəhudi murdar sayılırdı. Buna görə də qəbirləri ağardırdılar ki, heç kim təsadüfən onlara toxunmasın. Mahiyyət etibarı ilə, Paul baş kahini üzü ağardılmış qəbir adlandırdı.
Digər tərəfdən, öz xalqının rəhbərləri haqqında pis danışmaq cinayət idi (Çıxış 22:28). Paul Xananyanın baş kahin olduğunu yaxşı bilirdi, lakin o, romalılara xidməti qarşılığında qarınqulu, oğru, yırtıcı quldur kimi pis ad çıxarmışdı. Paulun cavabı əslində belə səslənirdi: «Mən heç vaxt ağlıma gətirməzdim ki, belə bir adam İsrailin baş kahini ola bilər». Bundan sonra Paul Ali Şuranın üzvləri arasında nifaq salacaq bir bəyanat verdi. Ali Şura etiqadları bir-birinə zidd olan fariseylər və sadukeylərdən ibarət idi. Fariseylər yazılmamış qanunun bütün təfərrüatlarına əsaslı əhəmiyyət verirdilər, sadukeylər isə yalnız yazılı Qanunu qəbul edirdilər. Fariseylər alın yazısına, sadukeylər isə iradə azadlığına inanırdılar. Fariseylər mələklərə və ruhlara inanırdılar, sadukeylər isə yox.
Beləliklə, Paul farisey olduğunu və ölülərin dirilməsinə inandığına görə mühakimə olunduğunu iddia edir. Nəticədə Ali Şura iki cəbhəyə bölündü. Mübahisə nəticəsində az qala Paulu parçalansınlar. Minbaşı onu şiddətdən xilas etmək üçün yenidən qalaya göndərdi.
11-24
Bu hissə iki cəhətdən vacib hesab olunur: birincisi, yəhudilər Paulu aradan götürmək üçün hər şeyə hazır idilər. Yəhudilər bəzi hallarda adam öldürməyə haqq qazandırırdılar. Məsələn, bir adam cəmiyyətə, əxlaqa təhlükə yaradırsa, onun qətli haqlı sayılırdı. Buna görə qırx nəfər Paulu öldürməyə and içdi. Bu and herem adlanırdı. Belə bir and içən şəxs deyirdi: «Əgər bunu etməsəm, Allah mənə lənət eləsin». Həmin qırx nəfər yeməməyə və içməməyə and içdi və Paulu öldürənə qədər Allahdan təcrid etməyə hazır idi. Xoşbəxtlikdən, onların planından Paulun qardaşı oğlu xəbər tutdu. İkincisi, biz Roma hökumətinin qərəzsiz ədaləti təmin etmək üçün hansı yollara getməyə hazır olduğunu görürük. Paul adi bir məhbus idi. Amma o, həm də Roma vətəndaşı idi. Buna görə minbaşı güclü hərbi konvoy yaratdı ki, Paulu vali Feliksin mühakiməsi üçün Qeysəriyyəyə təhlükəsiz şəkildə çatdırsın. Burada yəhudilərin — seçilmiş xalqın fanatik nifrəti ilə onların gözündə bütpərəst olan minbaşının tərəfsiz ədaləti arasındakı ziddiyyət diqqət çəkir.
25-35
Roma rəhbərliyi Yerusəlimdə yox, Qeysəriyyədə yerləşirdi. Hökmdarın iqamətgahı — pretoriya Qeysəriyyədə Böyük Hirodun tikdirdiyi sarayda yerləşirdi. Klavdi Lisiya qərəzsiz və ədalətli bir məktub yazdı. Beləcə konvoy yola düşdü. Yerusəlimdən Qeysəriyyəyə yüz kilometr məsafə var idi Antipatris isə Qeysəriyyədən qırx kilometr uzaqlıqda yerləşirdi. Antipatrisə gedən yol təhlükəli idi və ətrafda yəhudilər yaşayırdı; Qeysəriyyədən kənarda olan ərazi boş idi və pusqu hücumu üçün tamamilə yararsız idi. Burada əsasən bütpərəstlər yaşayırdı. Bu səbəbdən hərbi konvoyun çoxu Antipatrisdən qayıtdı, yalnız Paulu müşayiət edən atlılar qaldı.
Paulun hüzuruna gətirildiyi hökmdarın adı Feliks idi. Onun adı el arasında məsələ çevrilmişdi. O, beş il Yəhudeyada hökmranlıq etmişdi. Ondan iki il əvvəl Samariya hökmdarı idi; iki il də Yəhudeyanı idarə edəndən sonra vəzifəsindən uzaqlaşdırılmışdı. O, həyatına qul kimi başlamışdır. Onun qardaşı Pallus Neronun sevimlisi idi və onun sayəsində Feliks əvvəlcə azadlığını aldı, sonra isə hökmdar oldu. O, tarixdə Roma əyalətinin hökmdarı olan ilk qul idi. Roma tarixçisi Tasit onun haqqında demişdir: «O, padşahlığı qul ruhu ilə idarə edirdi». O, növbə ilə üç şahzadə ilə evlənmişdi. Birincinin adı məlum deyil. İkincisi Antoni və Kleopatranın nəvəsi idi. Üçüncüsü isə Birinci Hirod Aqrippanın qızı Drusilla idi. O, tamamilə prinsipsiz bir adam idi. Ən yaxın müttəfiqini öldürmək üçün bir qatil belə tutmağa hazır idi. Budur, Paul Qeysəriyyədə belə bir insanla qarşılaşmalı idi.